Bu Jeki Channing filmi emas, filmni
ko`rmaganman to`liq. Lekin Chan akaning bir jihatiga tan beraman. U ishtirok
etgan filmlarda vahshiylik va behayolikni targ`ib qiluvchi sahnalar yo`q. U
o`ynaydigan filmlar shu ikki omilni o`z ichiga olishi kerak, odatda. Ammo Jeki
bunga yo`l qo`ymagan. Bugun balki shu uchun uni qattiq hurmat qilishar.
Xulosa: Nasib qilsa, bu blogda ham shu ikki
illatdan, kimnidir kamsitishdan yiroq bo`lamiz.
Keling mavzuni
uchga bo`lamiz: SABAB, MAQSAD, NATIJA!
SABAB. Nega shu blog ochildi? Men hali blog
ishlatishda juda tajribasizman. Bu maqola birinchisi. Blogni qancha muddat
ishlatishim, qachongacha sabrim yetishi ham hali noma`lum. Lekin bir narsa
aniq: Men blog yuritishga ruhan tayyorman. Eng katta sabab shu. Mening ilhom
pariyim uzoq safardan qaytib keldi. Hozir ijod qilish mahali. Bu blog orqali
esa ijod na`munalarini Siz aziz o`quvchi bilan baham ko`rish imkoni bor. Bir
necha yil oldin jurnalistik mahorat maktabida tahsil olgandim. O`sha kezlari
ham hozirga o`xshab tinmay yozgim kelardi. Mavzu bo`lmasa ham. Yozaverardim,
yozaverardim. Yozganlarimning ko`pchiligi o`chog`imizda o`z umriga yakun
yasagan. Chunki o`sha paytlari yozganlarimning saviyasi ancha past edi. Yoqib
yuborganimda ham achinmaganman. Bugun esa menda yetarlicha tushuncha va uslub
shakllanib ulgurdi. O`quvchi nimani xohlashi, nima yozsam, meni tanqid
qilishlari borasida qarashlarim bor.
Xulosa: Ijod qilish payti keldi va bundan
maksimal foyda chiqarishga harakat qilaman!
MAQSAD. Tan olaman, bloggerlar o`rtasida
o`tkaziluvchi turli tanlovlarda qatnashish muhim maqsadlardan biri. Bu sinov,
bu yangi marralar va, albatta, yaxshigina daromad. Lekin men buni bosh maqsad
deyolmayman. Agar blog faqat tanlovlar uchun ishlasa, quruq eksponatdan farqi
qolmaydi. Bosh maqsad: Siz o`quvchiga kerak va qiziq bo`lgan mavzularga qo`l
urish, ularni yetarlicha yoritish. Agar shu maqsad bajarilsa, qolgani
o`z-o`zidan amalga oshaveradi. Oldindan aytishim mumkin, keyingi maqolalar
qanday uxlab turganim-u, nonushtaga nima yeganim haqida bo`lmaydi. O`zimning
hayotim bilan boshqalarni yaqindan tanishtirishni maqsad qilganimda boshqa
yo`ldan borardim.
Xulosa: Har bitta maqolaga ma`suliyat bilan
yondashishga harakat qilaman!
NATIJA. Bu joyga hozircha hech narsa yozmay
turamiz. Biz yo`lning boshidamiz hali. Nasib qilsa, blog ochilganining bir
yillik yubileyini nishonlayotganda xuddi shu holatdagi yana bitta maqola
yozaman va NATIJA qismida ham nimadir yozaman. Maqola nomi ,,Men endi kimman?”
bo`lar balki. Buni vaqt ko`rsatadi.
Ha aytgancha, ,,Men kimman?” savoliga qisqacha
javob: Anorov Bahodir Qobiljon o`g`li. 22 yosh. Samarqandlik. Filolog va
havaskor jurnalist! Bori shu!
Sezar aytganidek, ,,Qur`a tashlandi!”.
Boshladik…
